Pamahalaan ng Pilipinas/Pamahalaan sa Lokal na Antas

←Ang Hukuman

Pamahalaan sa Lokal na Antas

Pamahalaang Panlalawigan→

Sa kasalukuyan, may tatlong antas ng lokal na pamahalaan sa Pilipinas: sa barangay, lungsod o bayan at lalawigan. Sa Nagsasariling Rehiyon ng Muslim sa Mindanao o ARMM, may ika-apat na antas ang lokal na pamahalaan: sa antas ng rehiyon.

Herarkiya

Nakahati ang pamahalaang lokal sa Pilipinas sa sumusunod na paraan:

• Pamahalaang panlalawigan
  • Gobernador
  • Pangalawang Gobernador
  • Sangguniang Panlalawigan
• Pamahalaang pambayan at panlungsod
  • Alkalde (punong-bayan o punong-lungsod)
  • Pangalawang Alkalde
  • Sangguniang Bayan o Sangguniang Panlungsod
• Pamahalaang barangay
  • Punong Barangay
  • Sangguniang Barangay
  • Sangguniang Kabataan

Sa ARMM, nakahati ang pamahalaan ayon sa sumusunod:

• Gobernador
• Pangalawang Gobernador
• Batasang Panrehiyon (ARMM Regional Legislative Assembly)

Mga karapatan at kapangyarihan

Ang pamahalaang lokal sa Pilipinas ay umaayon sa sistemang unitaryo. Ibig sabihin dito ay ang pamahalaan ay sentralisado sa kabiserang pambansa, Maynila, at hindi gaanong makapangyarihan ang mga lalawigan o iba pang mas mababang antas ng pamahalaang lokal.

Ang namamahala sa mga karapatan at kapangyarihan ng mga yunit ng pamahalaang lokal ay ang Kodigo sa Pamahalaang Lokal, na itinatag noong 1991.